MitID-mut iseruit taannaluunniit atorlugu akuersiguit kinaanerit uppernarsartarpat. Allat MitID-it pissarsiarippassuk illiusuusaarsinnaapput. Inuttut nammineq MitID-vit isumannaatsuutinnissaa pingaaruteqarpoq - massakkut siunissamilu.
MitID-miisumannaallisaanermut ilitsersuut
MitID-ppit paarilluarnissaa pingaaruteqarpoq.
MitID aqqutigalugu log-inneraangavit akuersigaangavilluunniit kinaassutsit uppernarsartassavat. Allat MitID-nnut iseraluarunik kinaassutsinnik tillissinnaapput. Taamaattumik pingaaruteqarpoq MitID-ppit isumannaatsumiitinnissaa - maannakkut siunissamilu.
Ataani nassaarisinnaavatit qanoq iliornissannut siunnersuutit pisariitsut:
Illit MitID-t illit kisivit pigissavat
MitID-t imaluunniit MitID-nnut tunngatillugu paasissutissat allanut tunniutinngisaannakkit. Atuisutut ID-t kodellu taamaallaat ilinnoortuupput. Isumannaatsumiippata aamma illit ernumassutissaqassanngilatit.
SMS-ini e-mailinilu linkinik tuugaqanngisaannarit
Linkit atorlugit peqquserluttoqarsinnaavoq, ilimagisanniillu allamut isertissinnaavaatsit.
Internetikkut peqquserlunnerit nalinginnaanerpaat ilaat tassaavoq linkit aqqutigalugit quppernermut eqqorpasissumut eqqunngitsumulli iseqqusineq. Quppernermut peqquserlunniarluni suliamut log-innernermi, loginnit pinerluttunut nassiuttoorsinnaavat.
Linkit peqquserlunnianit sanaat atunnginnissaat anguniarlugu ajornannginnerpaavoq browserimi, soorlu Firefoximi imaluunniit Chromemi nammineq adressep allannissaa - ass. adressemut allaffissami una ikkullugu: www.MitID.dk Adresse nammineq allakkukku quppernermut iserfiginiakkannut isumannaatsumik isissaatit.
Adressemut allaffissami nittartakkap adresseata misissoqqaartarnissa ileqquliuguk.
- Adresset ilumoortut: www.MitID.dk og DinBank.MitID.dk
- Adresset peqquserlunniarluni sanaat: mitid.dk.bank.com og mitid.com/mitid.dk
Nittartakkap isumannaassusaa nalornissutigigukku MitID-mi ikiorsiiviup attaviginissaa siunnersuutigaarput.
Inunnut sianertunut paasissutissaatitit tunniutinngisaannakkit
Sianerfigitikkuit MitID-mi paasissutissaatinnik piumasunik, tamanna peqquserlunniarneruvoq.
Peqquserlunniarlutik sianertartut uppernarsinnaasarput. Nalorniguit aana siunnersuut ajornaatsoq: Oqarasuaat iliguk MitID-milu ikiorsiivik sianernerfigalugu. Normua uani nassaarisinnaavat: www.MitID.dk.
Normu peqquserlunniamit tunniunneqartoq sianerfiginngisaannaruk, naak pisortani normunut assingusinnaagaluartoq. Normu nittartakkamiittoq taamaallaat sianerfigisaruk www.MitID.dk.
MitID-mi kinaassutsimik uppernarsaatinik isumannaallisaanermut ilitsersuut
Kinaassutsimik uppernarsaatippit tillinneqannginnissaannut atornerlunneqannginnissaannullu
isumannaallisaanissaq pingaaruteqarpoq.
Innersuutigaarput MitID-mi atuisuuffinnut kinaassutsimik uppernarsaatit ataatsimiit amerlanerusut pilersinnissaat atuutilersinnissaallu. Soorlu MitID appi mobilinnut tebletinnullu ikkukkukku, MitID-mut suli isersinnaassaatit, mobilimullu nutaamut MitID atuutilerseriaannaassallugu, mobilit annaassagaluarukkuluunniit.
MitID appi
MitID appip Google Playikkut Apple App Storekkulluunniit aneqarsinnaasup atornissaa innersuutigaarput. Mobilit nassartuaannangajappat, taamaattumik tamanna isumannaallunilu ajornaappoq.
MitID atortorissaarutini pingasuni atorneqarsinnaavoq, kisianni eqqaamajuk: MitID appi mobilimi tabletimiluunniit illit nammineq aqutanni taamaallaat ikkutissagakku. Ass. nammineq illit mobilinni, suliffeqarfik aqqutigalugu mobilinni imaluunniit ilaqutariillusi tabletissinni.
MitID appinnut PIN-kodep illersornissaa eqqaamajuk - PIN-kodeppit pappiaqqamut allannginnissaa, allanut oqaatiginnginnissaa, mobilinni tabletinnilu kodeppit assinga atunnginnissaa siunnersuutigaarput.
MitID appi taamaattumik isumannaappoq:
- MitID appimi suut akuersissutigilernerlugit sumilu akuersilernerlutit erseqqissumik takusinnaavatit.
Ass. nittartakkamut log-innilernersutit imaluunniit aningaasanik nuussinissannut
akuersilernersutit takuneqarsinnaapput.
- MitID appi arfinilinnik kisitsisitalimmik PIN-kodeqarpoq. Inussap ipaasaat kiinnamillu ilisarsissut aamma atorsinnaavatit.
MitID-mi kodemik takutitsissut MitID-milu kodemik atuffassissut
MitID-mi kodemik takutitsissut MitID-milu kodemik atuffassissut, angerlarsimaffinnut matuersaatituulli paarilluartigikkit. Siunnersuutigaarput MitID-mi kodemik takutitsissut nassartuaannartussanngorlugu matuersaatippit akornannut nivinngarnissaat.
MitID-mi kodemik takutitsissut MitID-milu kodemik atuffassissut atugarigukkit eqqaamassavat:
- MitID-mi kodemik takutitsissut MitID-miluunniit kodemik atuffassissut allanut tunniutinngisaannaruk.
- MitID-mi kodemik takutitsissummiit MitID-milu kodemik atuffassissummiit kodet ataasiartakkat allamut kinaagaluartumulluunniit ingerlateqqinngisaannakkit. Kodet ataasiartakkat chatikkut, SMS-ikkut mailikkulluunniit nassiutinngisaannakkit.
- MitID-mi kodemik takutitsissummiit MitID-milu kodemik atuffassissummiit kodet ataasiartakkat taamaallaat MitID aqqutigalugu log-innerninni akuersininnilu allakkit.
- MitID-mi kodemik takutitsissummiit MitID-milu kodemik atuffassissummiit kodenik ataasiartakkanik allanneq aalajangersimasumik ingerlaaseqarpoq. MitID-mi kodemik takutitsissummiit MitID-milu kodemik atuffassissummiit kodemik ataasiartakkamik nalinginnaasumiit allaanerusumik allaqqusisoqarpat, browseri ingerlaannaq matussavat, nittartakkamullu iserfiginiakkannut ikiorsiivik attavigalugu.
MitID-mut chipimik isissutissaq
MitID-mut chipimik isissutissaq, angerlarsimaffinnut matuersaatituulli paarilluartigiuk. Siunnersuutigaarput MitID-mut chipimik isissutissaq nassartuaannartussanngorlugu matuersaatippit akornannut nivinngarnissaa.
MitID-mut chipimik isissutissaq atugarigukku eqqaamassavat:
- MitID-mut chipimik isissutissaq allanut tunniutinngisaannaruk.
- MitID-mut chipimik isissutissaq siullermeerlutit qarasaasiannut, mobilinnut tabletinnulluunniit atassusilerukku sianigeqqissaarit. Sumiiffimmi attavimmiit paasissutissanik tilliffiusinnaanngitsumiigit - ass. angerlarsimaffinni suliffinniluunniiit.
MitID-mut kodet isissutit
MitID-mi kodemik takutitsissut, MitID-mi kodemik atuffassissut imaluunniit MitID-mut chipimik isissutissaq atugarigukkit kodemik isissummik toqqaassaatit, MitID aqqutigalugu loginneraangavit akuersigaangavilluunniit atortagassannik. Kodemik isissummik toqqaanissannut siunnersuutit ajornaatsut aajuku.
MitID-mi kodet isissutit MitID-mi taamaallaat atoruk
Inuit amerlasuut kodet isissutit assigiit, iserfinnut assigiinngitsunut amerlasuunut atortarpaat. Kodet assigineqanngitsut iserfinnut assigiinngitsunut atornissaat pitsaaneruvoq. Pinerluttoq kodemik isissummik ataatsimik, iserfinni arlalinni atukkannik paasinnikkuni, iserfissannut assigiinngitsunut illiusuusaarluni isersinnaalissaaq.
Kode isissut nalunartoq atoruk
MitID-mi kode isissut minnerpaamik 8-nik naqinneqassaaq.
Aajuku kodemik isissummik nalunartumik toqqaanissamut siunnersuutit pisariitsut:
- Oqaaseq eqqaamannissut toqqaruk.
- Oqaatsimi eqqaamannissummiittut naqinnerit siulliit atorneqartut atorlugit oqaaseqatigiiliorit.
- Kisitsimmik naggaseruk.
Oqaatsimut eqqaamannissummut kodemullu isissummut assersuutit:
- Oqaaseq eqqaamannissut tassaasinnaavoq BOG, kodelu isissut tassaasinnaalluni BingoOgGolf5
- Oqaaseq eqqaamannissut tassaasinnaavoq MOBIL, kodelu isissut tassaasinnaalluni MorOdaBliverILandsbyen2
- Oqaaseq eqqaamannissut tassaasinnaavoq SJOV, kodelu isissut tassaasinnaalluni SomJegOpleverVitser8
Oqaaseq eqqaamannissut kodeli isissut nammineq sanakkit.
Kode isissut pappiaqqamut allanngisaannaruk
Kodep isissutippit puigornissaa ernumassutigigukku siunnersuutigaarput Password Managerip atornissaa, taamaalillutik kodet isissutitit eqqaamasinnaaniassagakkit.